Upptakt: KÍ-07 Vestur
Í kvøld skal KÍ royna at vinna triðja landskappingardystin á rað.
Tað er trýst á KÍ undan hvørjum dysti, tí skal liðið inn aftur í FM-stríðið, so skulu nærum allir dystir vinnast. Hesaferð vitjar 07 Vestur, sum við sínum nýggja liði er steðgað eitt sindur upp. Men liðið hevur dygdir og hevur fyrr í ár fingið stig í Gundadali móti B36.
Hjá KÍ er skaðalistin langur. Jákup B. Andreasen er lagdur afturat teimum langtíðarskaddu leikarunum. Síðani eru tað Deni Pavlovic, Mads Bo Mikkelsen og Patrick Da Silva, sum neyvan verða klárir, meðan René S. Joensen fór haltandi út seinast. Hjá 07 Vestur hava onkrir skaðar verið seinastu tíðina. M.a. hevur álopskendi bakkurin Kevin Egell-Johnsen ikki spælt.
Dysturin í Klaksvík í kvøld byrjar kl. 18.30. Dómari verður Jóhan Hendrik Ellefsen.