Kommunan boðar frá á heimasíðuni at ferðslan eftir Stangavegnum verður skipað einvegis suðureftir, tí vegastrekkið skal gerast liðugt. Í mun til ferðsluna norður eftir vísur kommunan til Heygaveg/Garðaveg ella Kráargøtu/Kjalarveg. 

Tunga ferðslan - trailarar, lastbilar v.m., kann bert brúka Kráargøtu at koyra norðureftir og har er stórt graviarbeiði júst farið í gongd og sum myndirnar vísa er ruðuleiki á strekkinum. 

Ein bilførari hevur sett seg í samband við Norðlýsið og ynskti at verða ónevndur. 

- Hetta er klossut av kommununi. arbeiði eftir stangavegnum hevur verið í gongd í 2 ár nú, og skuldi bert tikið 3-4 mánaðar at gjørt liðugt. At fara í gongd júst nú meðan stórt kápul-graviarbeiði er á Kráargøtu er bara for klossut. 

- Kunningin er eisini ov vánalig. Eg havi longu sæð fleiri stórar bilar komnar norður til Magn og síðani eru teir noyddir at venda. Tá teir so koma niðan eftir Gerðagøtu og skulu venda til vinstru inn á Kráargøtu, so er tað ógjørtligt og tí mugu teir fara heilt til rundkoyringina í Boroyarvík at venda og so koma aftur oman eftir Gerðagøtu og draga inn til høgru á Kráargøtu, sigur ónøgdi bilførarin

Vit fingu nakrar myndir, sum vísa ruðuleikan.