Vegard Forren krevur 4,4 milliónir í endurgjaldi
Fyrrverandi KÍ- og Brann-spælarin Vegard Forren kennir seg verða forfylgdan av órøttum í gøluni, sum verður rópt Nachspiel-skandalen í Noregi. Sambært norska BT krevur hann 4,4 milliónir norskar krónur frá statinum.
Í sonevndu Nachspiel-gøluni, sum hendi – ella ikki hendi – á Brann Stadion, varð Vegard Forren skuldsettur fyri valdstøku (neyðtøku), og sambært Forren sjálvum varð hansara fótbóltskarriera púra oyðiløgd av hesum. Sakførarin hjá Forren, John Christian Elden, sigur, at sakarmálstíðin hevur verið alt ov long, og tað er sera hart fyri tey, sum verða rakt av ósonnum ákærum. Ákæran varð løgd til viks í oktober í 2021. Kvinnan hevur heldur ikki fingið endurgjald sum offur.
Í dag spælir Vegard Forren í 3. división í Noregi við felagnum Træff. Hann var við í KÍ í fjør, sum kláraði søguliga langt í Europa. Eftir gøluna hevur Forren ikki spælt á hægsta stigi í Noregi, og hann sigur sum nevnt gøluna hava oyðilagt hansara møguleikar innan fótbólt framyvir.