![](/upload/cache/images/326401-326600/405d9d61f93b4fb186a95ef1f8c8f5287d620479_w640_h0_fS.png)
Lýsing eftir løgfrøðingi
Áhugavert og fjølbroytt starv sum løgfrøðingur leyst at søkja í Barna- og útbúgvingarmálaráðnum til setanar skjótast gjørligt.
Starvi
Talan er um eitt fulltíðarstarv í einum spennandi politiskum arbeiðsumhvørvi. Løgfrøðingurin arbeiðir á Fakdeildini við løgfrøðiligum málum innan barnaøkið, harundir barnaverndarøkið. Uppgávurnar í Barna- og útbúgvingarmálaráðnum eru bæði fjølbroyttar og áhugaverdar. Høvuðsuppgávurnar eru m.a. hesar:
- Lóggávumenning – at taka lut í fyrireikingini av lógar- og kunngerðaruppskotum og regluverki
- at tulka lógir, kunngerðir og reglur
- at veita leiðslu og starvsfólkum í ráðnum løgfrøðiliga ráðgeving og vegleiðing
- at viðgera kærur í samráð við aðrar partar í ráðnum
- løgfrøðiliga at góðskutryggja málsøki ráðsins í síni heild
- at svara fyrispurningum frá Løgtinginum
- at umboða ráðið í tvørgangandi samstarvi
- at lýsa og avgreiða mál, ið hoyra stjórnarráðnum til
Førleikakrøv
Umsøkjari til starvið skal hava løgfrøðiligt embætisprógv, cand.jur., ella javnbjóðis prógv, vera skipaður og duga væl at orða seg á føroyskum og skandinaviskum, bæði í skrift og talu.
Talan er um sjálvstøðugt arbeiði, umframt at arbeiða í toymi og arbeiðsbólkum. Tú skalt vera tænastusinnað/ur, fyrikomandi og hava góð samstarvsevni. Tú skalt hava førleika at seta teg inn í nýggj viðurskifti og duga at miðla hetta víðari til onnur. Eisini mást tú vera før/ur fyri at kunna arbeiða undir einum ávísum trýsti. Tú skalt hava góð analytisk evni umframt politiskt tev og áhuga fyri samfelagsviðurskiftum í síni heild eins og førleikar í fremmandamáli, serliga enskum.
Vit bjóða
Starvið er spennandi við skiftandi uppgávum og við nógvum samskifti inn- og úteftir. Arbeiðið er á einum høgum fakligum stigi, og møguleikarnir fyri bæði persónligari og fakligari menning eru góðir.
Setanar- og lønartreytir
Starvið verður sett sambært sáttmála millum Fíggjarmálaráðið og Búskapar- og løgfrøðingafelagið. Setanarøkið fevnir um øll stjórnarráðini, Løgmansskrivstovuna og deildir teirra.
Umsókn
Umsókn við prógvum, CV og øðrum viðkomandi skjølum skal sendast til:
Barna- og útbúgvingarmálaráðið
J. H. Schrøtersgøta 7
110 Tórshavn
ella við telduposti til: bumr@bumr.fo
Umsóknin skal verða okkum í hendi í seinasta lagi sunnudagin 11. august 2024. Um tú ynskir fleiri upplýsingar, kanst tú seta teg í samband við Elsu Østergaard, deildarstjóra, á tlf. 555004 ella t-post elsao@bumr.fo.
15. sep 2024
![](/upload/cache/images/327801-328000/5eb79dc7f3cfd1c9a2ec97ebe345240fdd941fdc_w180_h0_fS.jpg)
16. sep 2024
![](/upload/cache/images/328201-328400/a9557d01555b5cb69244af3700c41946cb6f4c64_w180_h0_fS.png)
16. sep 2024
![](/upload/cache/images/328601-328800/a0137b1929ca85ec4061ce5294add827602b27ea_w180_h0_fS.png)
20. sep 2024
![](/upload/cache/images/328801-329000/d16dab7dac108d60c9a178f44fdcdd370a942935_w180_h0_fS.png)
16. sep 2024
![](/upload/cache/images/328401-328600/c9579a7c8f10e0d69b97ddf78e7b2d0ea23ad2a6_w180_h0_fS.png)