Signhild 28.75 og føroyskt juniormet í 50 rygg
Hetta hendi í gjár, tá ið tær kappaðust í finaluni í 50 metra ryggsvimjing, á Norðurlendsku Meistarastevnuni 2017.
Heimasíðan svimjing.com upplýsir at Signhild Joensen úr Ægir svam teinin uppá 28.75 sekund, har Birita Debes átti føroyska juniormetið á 29.00 sekund, frá FM 2010.
Tað hevur annars gingið væl hjá Signhild. Undan juniormetinum hevur hon sett tvey føroysk met og eisini vunnið bronsu
Signhild Joensen megnaði tvær ferðir at seta føroyskt met og juniormet í 100 metra ryggsvimjing, umframt at vinna sær norðurlendskt bronsuheiðursmerki á teininum, tá ið hendan kapping varð avgreidd nú á fyrsta degi av NM/NJM 2017 i Reykjavík.
Fyrst svam hon 1:00.91 í innleiðandi riðlunum um morgunin, til at kvalifisera seg til finaluna sama kvøld, og síðani betraði hon aftur um síni met til 1:00.50 í finaluni, sum rakk til bronsu í sera tættari kapping við donsku Sara Sylvest á 1:00.31 og Onnu Brandt Nielsen á 1:00.48.
Signhild átti sjálv føroyska metið og juniormetið á 1:01:00, frá Ægir-stevnu í oktober mánaða.