Millum annað grundgav Jógvan Skorheim, at samgongan ferð eftir ferð hevur sagt seg vilja eina breiða semju um fiskivinnuuppskotið, men hevur gjørt alt ov lítið fyri at náa einari semju. Snakkað hevur verið um, at Sambandsflokkurin var næmastur einari semju við samgonguna, men seinasti viljin til eina breiða semju er tó ikki komin til sjóndar.

- Hetta er grundarlagið sum okkara høvusvinna skal byggja á. Hetta er grundarlagið undir okkara tjóð, og tá hevur tað sera stóran týdning, at breið semja kann finnast í løgtinginum. Onki annað land hevði gjørt so víðttgangandi broytingar, uttan at fingið eina breiðan og stabilan meiriluta í parlamentinum, sigur Jógvan Skorheim.

Norðlýsið er í Løgtinginum og fylgir gongdini. Fleiri tinglimir standa enn á røðaralistanum, og tí kann væntast at orðaskiftið fer at halda áfram nakrar tímar afturat.

Uppskotið um at koyra málið aftur í nevnd verður atkvøtt um tá ið viðgerðin er liðug.