Fíggjarætlanin vísir eitt avlop á kr. 1.613.000,-  tá rentur og avdrøg eru goldin. Samlaðu inntøkurnar eru mettar til kr. 17.586.000,- íroknað afturbering fyri eldraøki. Samlaði raksturin, íroknað eldraøkið, er mettur til kr. 13.421.000,- og íløgur verða gjørdar fyri kr. 1.800.000,-  Íløgurnar fevna millum annað um spælipláss, vegir og liðugtgerð av kloakkum.

Skattaprosentið fer niður á 19,75% og barnafrádrátturin verður óbroyttur kr. 7.000,-

Bygdaráðið samtykti eisini, at uppraðfesta borgarstjórastarvið til fulltíðarstarv. Hetta merkir, at Irdi Jacobsen frá 1. Jan 2018 verður borgarstjóri fulla tíð, og samstundis fer í farloyvi frá Miðnámi á Kambsdali, har hon hevur starvast sum lærari síðani 2013.

Tað gongur væl í Hvannasunds Kommunu. Kommunan hevur seinastu tvey árini havt umleið 20% vøkstur í persónsskattinum um árið. Nettoognin hjá kommununi er í dag umleið 4 mió, sum svarar til ein triðing av álíkningini komandi ár.

Skúlin á Fossánesi varð útbygdur í 2009, og í 2012 lat nýggjur dagstovnur upp við vøggustovu, barnagarðsstovu og frítíðarskúla frá 1 til 3 flokk. Gjaldið á dagstovninum er millum tey lægstu í landinum og stovnurin hevur tøk pláss.

Hvannasunds Kommuna er væl brynjað til tær avbjóðingar, sum liggja fyri framman, og hevur í dag samstørv við Klaksvíkar kommunu, um m.a. eldraøki, barnavernd, tilbúgving og framhaldsdeild.