Í tíðindasending hjá KVF á nátturða 9. januar royndi útvarpskvinna í besta Lucky Luke stíl, at “skjóta mannin til avlívs”, tí hesin í ávísum máli, hevði nýtt orðið “varetægt”, sum, sambært útvarpskvinnuni, bert hevði tann eina “týdningin”. Ja, í heilar 5 minuttir fór hesin glantrileikur fram, har tað tyktist, sum útvarpskvinnan royndi at stuðla uppundir eina niðurstøðu, hon, áðrenn samrøðuna, hevði gjørt sær.

Kundi ikki annað enn seta mær spurningin, um í hvønn mun hatta innslagið livdi upp til ásetingarnar í Public Servic sáttmálanum um óheftni, sakligheit og at vera álitismennandi ?

Tað stutta av tí langa er, at Edvard Heen hevur torað alment at stigið fram og tala sak teirra veikastu, ið fáa tænastu frá Almannaverkinum! Hetta hevur eisini verið ein dyggur stuðul hjá avvarðandi og økt um tryggleikakenslu teirra – ikki minst, tá  harðast leika á ! Tað var ein byrða, sum fall av herðunum hjá mongum avvarðandi, tá avtalan um undantøk kom í hús.

Politiski myndugleikin – fíggjarmálaráðið - og als ikki stjórin á Almannaverkinum, hevur ábyrgd av íkomnu støðuni. Meðan tey, ið ábyrgdina hava, hava grivið seg niður, hevur stjórin talað sak teirra, ið hava størsta tørvin  og hildið fast við týdningin av, at neyðugt var við optimalum undantøkum. Hann kundi, sum politiski myndugleikin, ypt øksl og latið staðið til. MEN tað gjørdi hann tíbetur ikki – og tøkk fái hann fyri tað! Við hesum vísti hann bæði ábyrgd og dugnaskap.

At júst hansara samskifti við fakfelagið gav úrslit, fegnast vit sum avvarðandi um!

At Pedagogfelagið stríðist fyri hægri løn er vælskiljandi og haldi meg ikki taka munnin ov fullan, tá sagt verður, at tað er Fíggjarmálaráðið væl stuðlað av forkvinnuni í KAF, sum við feskum fordømi og úttalilsum í tí sambandi, hevur lagt eitt støði og við tí skapt “forvantningar” um munandi hægri løn fyri limirnar í Føroya Pedagogfelag. Tað er teim væl unt!