Í summar tóktist tað sum um veitsludámurin í Klaksvík ikki vildi enda, og tað sama kann sigast eftir tann hektiska jólamánaðin. Í ár hevur veðrið verið við okkum, og tiltakið Norðurljós var eitt av teimum tiltøkunum, har alt bara spældi við og gekk upp í eina hægri eind. Fyriskipararnir hava stórt rós uppiborið, og ein tøkk til veðurgudarnar skal eisini sendast upp herfrá. 

Steintór Rasmussen var tó ikki tann einasti, ið varð heiðraður í farnu viku, tí fleiri heiðrar fullu nevniliga í nærumhvørvinum. Á Ársins Leiðaradegi varð Frimodt Rasmussen, stjóri á Klaksvíkar Sleipistøð, kosin til ársins leiðara á privata arbeiðsmarknaðinum. Á almenna arbeiðsmarknaðinum býr ársins leiðari í Gøtu og stendur á odda fyri Miðnámi á Kambsdali; Páll Isholm varð kosin ársins almenni leiðari 2018. Og Heiðursgáva Landsins fór til ein fuglfirðing; Frits Johannesen fekk hendan heiður fyri multikunstaravirksemi sítt ígjøgnum fleiri áratíggju.

The show must go on, og næst á skránni eru Torradagar. Hesaferð er fiskivinnan í fokus, men millum onnur tiltøk á døgunum kunnu nevnast framløga um Læknastríðið og fyrilestur um føroyska sjófuglin. Størsta tiltakið verður afturvendandi Fiskivinnutingið, ið hesaferð fer at taka samanum nýggju fiskivinnulógina, sum hevur fingið nógvar ákoyringar úr okkara øki og sum vit ikki heilt hava sæð fylgjurnar av enn. Eisini kemur Helgi Jacobsen at greiða frá søgum av Flemish Cap. Dagarnir verða hildnir í Klaksvík 19.-24. februar, og meira verður at frætta í Norðlýsinum, so hvørt vit nærkast.

Beint tá Torradagarnir enda byrjar Klaksvíkskappingin í fótbólti, har fýra tey fremstu liðini í landskappingini árið fyri hittast í Klaksvík. Aftur hesaferð er talan um Víking, KÍ, NSÍ og B36, ið eisini vóru nr. 1-4 í 2016 – í júst somu raðfylgju. Hesi somu fýra eru samstundis eisini steypafinalistarnir bæði árini, og eftir fyrireikingunum at døma ætla feløgini minst tað sama í ár, so alt týðir uppá eitt sera spennandi kappingarár í fótbólti.

Samanumtikið kann ikki sigast annað, enn at tað grør um gangandi fót í norðara og eystara parti av landinum, og at vit sum búleikast her í økjunum bæði við nøgdsemi kunnu hyggja aftur á tað farna og við spenningi líta frameftir – hóast vit ikki eru álvulig við fiskivinnunýskipainina.