Kristian Joensen er annar fjepparin vit seta stevnu undan Klaksvíkskappingini, sum fer av bakkastokki í morgin. Kristian hevur verið virkin í mong ár innan KÍ, bæði sum leikari, venjari, dómari og hjálparfólk. Seinastu mongu árini hevur hann røkt frásøgustarvið í búrinum tá KÍ spælir heimadyst. Kristian er kendur fyri at verða bersøgin.

Tá vit spyrja hvat hann heldur um KÍ hópin í ár, er hann ivaleysur.

- Eg haldi at hópurin er merktur av ov nógvum leikarum ið ikki eru vaksnir upp í KÍ, sigur Kristian

Spurdur um hvørjar vónir hann hevur til KÍ svarar hann kontant.

- Nú tá felagið hevur leita sær nógv fremmand fólk, so vænti eg at hesir leikarar, allir sum ein eru á einum hægri støði enn okkara egnu, ella kunnu teir tað sama verið heima. So eg vænti og krevji meistaraheitið 2018, kryddað við einum steypasigri.

Tað er altíð spennandi at síggja nýggjar ungdómsleikarar koma á besta liðið og vit spyrja Kristian um hvønn leikara vit serliga skulu hava eyguni eftir.

- Eg vænti ikki at nakar fer at koma ígjøgnum. Mín vón er at KÍ í 2018 fer at spæla sjampanju fótbólt, eg eri ein av teimum, ið als ikki tími at síggja gypp og verjuspæl. Vit hava nú ogna okkum fleiri leikarar uttanifrá, hesir eiga allir at verða á hægri støði enn okkara, so nú verður spennandi.

Klaksvíkskappingin byrjar nú leygardagin og skráin er hendan. 

Leygardagin 24 februar kl. 13:00: B36 – Víkingur

Leygardagin 24 februar kl. 15.30: NSÍ – KÍ