Klaksvíkskappingin: NSÍ-KÍ 0-2
NSÍ trýsti og rakti stengurnar fleiri ferðir, men KÍ fekk málini og vann sær pláss í finaluna í Klaksvíkskappingini.
NSÍ byrjar við hesum liðnum (4-4-1-1): Símun Rógvi Hansen – Bárður J. Hansen, Per Langgaard, Jóhan T. Davidsen, Einar Tróndargjógv – Øssur Dalbúð, Karl Løkin, Betuel Hansen, Pól Jóhannus Justinussen – Árni Frederiksberg, Klæmint A. Olsen.
KÍ byrjar við hesum liðnum (4-4-2): Meinhardt P. Joensen – Kristoffur Jakobsen, Hørður H. Askham, Deni Pavlovic, Óli Ey. Poulsen – Jóannes Bjartalíð, Jákup B. Andreasen, Semir Hadzibulic, Ronni Møller-Iversen – Boris Dosljak, Páll A. Klettskarð.
Dómari: Jóhan H. Ellefsen. Linjuverjar: Beinir Johannesen og Julian Gregersen.
5 min.: Góð líkindir til fótbólt í Klaksvík í dag. Bæði liðini spæla við sterkum. Tað hevur gingið javnt á og mest eyðsýndi leikarin fyrstu løtuna hevur verið Semir Hadzibulic, sum hevur dribla, fingið fríspark og havt fyrstu royndina á mál.
11 min.: 1-0 til KÍ. Ronni Møller-Iversen legði bóltin til Semir Hadzibulic, sum við vinstra beininum skeyt í málið.
Hálvleikur: 1-0 til KÍ. Bæði liðini hava havt onkra góða roynd á málið, men tað er bara eitt mál komið, sum KÍ fekk. Spælið hevur ikki verið serliga flótandi og tað sást, at vit eru tíðliga í árinum.
60 min.: So er 2-0 til KÍ. Jákup legði út í høgru til Jóannes Bjartalíð, sum sendi væl innfyri til Páll A. Klettskarð, sum bara kundi trilla í málið. Hetta er tó ikki í tráð við leikgongdina í seinna hálvleiki, tí NSÍ hevur havt tríggjar góðar royndir í seinna hálvleiki, ið tað sama kundu givið mál. M.a. skallaði Klæmint A. Olsen á yvirleggjaran.
Liðugt: KÍ vann 2-0 við málum frá Semir Hadzibulic og Páll A. Klettskarð. Men talan var um javnan dyst og í seinna hálvleiki raktu NSÍ leikararnir tvær ferðir á stengurnar. NSÍ hevði eisini aðrar stórar møguleikar, men KÍ fekk málini og skal spæla finaluna móti Víkingi í morgin kl. 15.30, meðan NSÍ og B36 spæla um 3. og 4. pláss kl. 13.00.