Formaðurin og næstformaðurin í Sambandsflokkinum skulu veljast av nýggjum á hvørjum árið, og tá freistin at stilla upp til ársfundin leygardagin, var úti á miðnátt mánadagin varð greitt, at eittans valevni er til formanspostin. Sostatt verður Bárður Nilsen afturvaldur á Landsfundinum leygardagin..

Hinvegin er greitt at kampval verður um næstformannsessin. Tað er greitt eftir at valfelagið hjá Sambandsflokkinum í Eysturoynni, Samhald, hevur innstillað Helga Abrahamsen til næstformannsvalið ímóti verandi næstformanni, Magna Laksáfoss.

-  Vantandi samstarv millum formannin og næstformannin í flokkinum, er orsøkin til at vit vilja hava ein nýggjan næstformann, sigur Hans Kristian A. Abrahamsen, formaðurin í Samhald við Norðlýsið.

-  Tað ber ikki til at hava ein næstformann, sum ikki bakkar formannin upp, og tí hava vit valt at stilla Helga Abrahamsen upp til næstformann. Vit ynskja flokkinum tað besta, so flokkurin kann standa seg væl til komandi løgtingsval og tí eru vit sannførd um at hetta er tað besta vit kunnu gera fyri flokkin, sigur formaðurin í Samhald.

Landsnevndin í Sambandsflokkinum hevur fund í annaðkvøld og tá hittast lokalformennirnir saman við tingmanning flokksins á fundi á Gamla Apoteki. Tá fæst óivað ein ábending um hvør av kandidatunum hava størst stuðul millum nevndarlimirnar í økisfeløgunum og tingmanning flokksins, sum saman við starvsnevndini kunnu atkvøða á Landsfundinum.

Landsfundurin hjá Sambandsflokkinum verður á Hotel Hafnia leygarmorgunin kl. 8:30.