Finland avtekur lærugreinir í skúlanum
Í Finlandi eru ætlanir um at kollvelta skúlaskipanina og avtaka siðbundna lærugreinabýtið. Marjo Kyllonen frá Undirvísingarmálaráðnum í Helsinki, sigur, at undirvísingarskipanin, sum er innrættað eftir næmingum í byrjanini av 1900-talinum, ikki longur er tíðarhóskandi ella gagnlig fyri framkomna læring. Hon metir, at tørvurin er broyttur so mikið, at tað er neyðugt at broyta lærihættin, so hann passar saman við nýggja háttin at hugsa og innan menning.
Størsta broytingin er, at lærugreinir skulu takast av tímatalvuni, og í staðin skulu onnur tiltøk setast inn. Hetta merkir at næmingarnir ikki longur skulu hava lærugreinar sum støddfrøði, landalæru og søgu, men í staðin studera hendingar og fyribrigdi. Til dømis skal 2. heimsbardagi studerast støddfrøðiliga, landafrøðiliga og søguliga. Eitt ítøkiligt skeið er longu í umbúna við arbeiðsheitinum “Working in a café”, sum skal handla um at læra enskt, økonomi og samskifti.
Hendan nýggja skipanin skal byrja í 2020 fyri næmingar sum eru fyltir 16. Hetta merkir at aftaná tað sum umleið svarar til fólkaskúlan skulu næmingarnir kunna velja eina sovorðna hending ella fyribrigdi, sum tey vilja studera, við støði í áhuga og framtíðarætlanum. Endamálið er at spesialisera næmingarnar og frítaka teir frá at skula sita í flokshølum og læra alt møguligt, sum teimum ikki tørvar kortini.
Finska útbúgvingarskipanin leggur eisini upp til meira samstarv, har næmingarnir skulu arbeiða saman í smáum kjakbólkum, heldur enn aftanfyri skriviborð har teir lurta eftir einum lærara. 70% av lærarunum í Helsinki eru longu byrjaðir at fyrireika seg til nýggja læriháttin, og teir sum gera tað, fáa eina lønarhækkan.
Finska útbúgvingarskipanin verður roknað sum ein tann besta í heiminum, og hendan drastiska broytingin fer møguliga at ávirka onnur lond eisini.
Sí framløgu hjá Marjo Kyllonen har hon tosar um hvussu vit eiga at útbúgva okkara ungu til framtíðina.