Hesin spurningur varð settur Henrik Old, landsstýrismanni, um viðurskiftini hjá avgreiðslufólki hjá Strandfaraskipum Landsins á útoyggj

1

Hvussu er lønin sett saman hjá avgreiðslufólki, ið umsita ávísar samfelagsveittar tænastur á útoyggj, eitt nú at avgreiða strandferðsluskip?

2

Er tað rætt at starvsseta fólk í 7 dagar um vikuna til minni enn eina løn hjá teimum, ið sigla við skipum hjá Strandfaraskipum Landsins, og tey samstundis noyðast at løna øðrum, skulu tey av oynni?

3

Nú er nýggj skipan á veg við flytbarum oljutangum til Fugloyar. Ætlanin er, at tað verður sami maður, sum veitir tænastur fyri strandferðsluna, sum eisini kemur at taka sær av oljuveitingini fyri Magn. Er hetta lagt oman á arbeiðsbyrðina í oynni?

Til tess at fáa greiði á, hvussu arbeiðsviðurskifti og serliga lønarviðurskifti eru hjá avgreiðslufólki á útoyggj, so vóru hesir spurningar settir landsstýrismanninum í morgun. Tí at stavnsbinda fólk var neyvan ætlanin við tí arbeiðsleisti, ið einaferð varð skipaður á smáplássum og á útoyggj. Tað er ikki rætt, at fólk eru í starvi fyri minni enn slík løn átti at verið normerað.

Fyri bygdafólk hevur avgreiðslufólkið á staðnum ein sera týðandi leiklut. Og nú rættiliga nógv ferðafólk koma út á smáu oyggjarnar, so setir hetta upp aftur størri krøv til avgreiðslu o.a. Vit eiga sum landsins myndugleikar at tryggja útoyggjafólki virðiligar arbeiðs- og lønarviðurskifti.

Landsstýrismaðurin upplýsti, at avgreiðslufólkini á útoyggj eru lønt sum sjálvstøðug vinnurekandi við ymsum uppgávum. Hann vísti somuleiðis á, at longu í komandi mánaði verður greitt við einari nýggjari “eitt til eitt” skipan. T.v.s. at hesar uppgávur verða mannaðar sum størv og lønt hareftir.

Harumframt upplýsti landsstýrismaðurin eisini, at peningur nú er játtaður bili at koyra í millum bygdirnar í Fugloy, so ikki er neyðugt at leggja at bæði í Hattarvik og á Kirkju, men flutningur kann verða við bili.

So nú kunnu vit gleðast um, avgreiðslufólk fáa virðiligari umstøður, og bygdafólk fáa betri umstøður at virka í Fugloy eins og á øðrum útoyggjum.