Áhugafelagið Nólsoyar Páll ársaðalfund
Í gjárkvøldið var ársaðalfundur hildin í Nólsoyar Páls húsinum, har væl av fólki møtti upp eisini aðra staðni frá.
Áðrenn aðalfundin hittist nevndin til stuttan fund í hoyggjhúsinum, meðan sjálvur aðalfundurin, sum sagt varð hildin í Nólsoyar Páls húsinum.
Tað kendist ikki sørt hátíðarligt og søguligt – fjálgt var inni og boðið varð til ein góðan kaffimunn, har Mimmi frá matstovuni, Fríðu var sloppin at blaða í kókibókini hjá Apoloniu, dóttir Nólsoyar Páll, og hevði funnið eina serliga fromagu, sum hon gjørdi til hetta serliga høvið.
Formaðurin, Archibald Black greiddi frá virki felagsins farnu 2 árini. Tað eru sløk tvey ár síðani, at elsta fólkið á Biskupsstøð, Brita, legði grundarsteinin; og fór tá felagið, Hjálpirót undir laðingina. Hann frøddist um, at arbeiðið uppá húsini er komið so mikið langt, at nú eru húsini tøtt.
Og nú líður væl við grótarbeiðinum uttanfyri eisini, har vakurt steinlagt tún er gjørt og so eisini ein “amfi-trappa” oman móti sjónum, har eisini ber til at skipa fyri ymsum úti-tiltøkum.
Tað størsta arbeiðið, sum nú stendur fyri, er at bjálva takið og síðani legga flag á. Ætlanin er at fáa hetta arbeiðið gjørt nú móti sumri.
Húsið liðugt
Formaðurin segði, at hann javnan fekk spurningin: Nær verður húsið liðugt? Hann helt fyri, at tað var torført at áseta ein ávísan dag, men hann vildi kortini siga so mikið sum tað, at hann roknaði við, at tað fór at líða væl, tá ið vit koma nakað út á heystið.
Annars hevur verkætlanin verið lutað í trý, greiddi Archibald frá, Nólsoyar Páls húsið, túni og “amfi-trappan” og sum triðja byggistig er avgjørt at seta bakkahjallarnar í stand.
Líggjas í Bø greiddi frá grannskoðaðu roknskapunum fyri tíðarskeiðini 2016 og 2017. Tað sum nú er gjørt og bygt kostar kr. 2 mill. Felagið er væl fyri og ber til at gera húsið liðigt við tí stuðli, felagið hevur fingið.
Felagið væl stuðlað
Áhugafelagið hevur tvey sløg av inntøkum, sum er inntøku av limagjaldi, og so stuðulin teir hava fingið til at byggja upp aftur Biskupsstøðgarðin. Henda inntøkan fer óskorin til byggingina.
Áhugafelagið hevur eisini útreiðslur til rakstur av felagnum s.s. til grannskoðara, bankakostnaða, og onkuntíð eitt sindur til umboðan. Hesar útreiðslur verða goldnar av tí, sum inn kemur við limagjaldi.
Teir báðir Líggjas og Archibald takkaðu størliga stuðlunum, sum høvdu verið hollir og stuðlaðverkætlanini væl.
Nevndin afturvald
Til nevndarvalið, sum er eitt mál á skránni fyri aðalfundin, varð sitandi nevnd afturvald við lógvabrestum. Í nevndini fyri Áhugafelagið, Nólsoyar Páll sita Archibald Black, Líggjas í Bø, Anfinn Kalsberg og Finnur Kjølbro.
Jú, sigast má, at hetta var ein hugaligur fundur fyri eini ikki minni hugaligari verkætlan, ið hevur vakt áhuga víða – og koma næstan dagliga einstaklingar og bólkar inn á gólvið og spyrja við áhuga, hvussu gongur.
Til ber at tekna seg sum lim á http://nolsoyarpall.fo – Tú avger sjálv/ur hvat tú stuðlar við í limagjaldi.