Klaksvíkar kommuna spenti seg út í Keypmannahavn í kvøld. Skipað varð á øðrum sinni fyri tiltaki nevnt Uppliv Klaksvík. 

Jógvan Skorheim, borgarstjóri í Klaksvíkar kommunu hevði framløgu, har hann greiddi frá hvussu býráðið arbeiðir við at menna kommununa til framtíðina.

Kjartan Hansen & Eskild Norðbúð frá Kanjon tosaðu um framtíðar vinnumøguleikar í Klaksvík

Bjartur Nolsøe frá Íverksetarahúsinum greiddi frá hvussu tey í Íverksetarahúsinum kundu hjálpa vinnuspírum.

Atli Danielsen, fíggjarleiðari í Norðoya sparikassi vísti á hvussu hansara royndir høvdu verið at flyta heim og fáa starv.

Ein av heilt stóru løtunum varð tá fundarfólkið slapp at smakka Norðoyggjar. Toskur frá Gadus, Makrelur og sild frá Christian í Grótinum og mjøður frá Føroya Bjór leskaðu gómarnar í steðginum. Kokkarnir høvdu gjørt tapas úr fyrsta floks rávøruni - Michelin stjørnan liggur bara og bíðar eftir heimsins bestu fiskamatstovu í Klaksvík. 

Útisetar sluppu síðani til orðanna, har tey settu borgarstjóranum spurningar um mangt og hvat. 

Hallur Joensen og Jógvan Hansen framførdu sínar góðu sangir. Ómetalig góð og innilig løta.

At enda varð drigið millum øll vitjandi um atgongumerkir til Summarfestivalin og gávukort frá Klaksvíkar handilsfelag.

Gjøgnum kvøldið bar eisini til at uppliva nýggja miðbýin í Klaksvík í tykisveruleika (Virtual reality), og harumframt vórðu góðir møguleikar fyri at netverka og fáa svar uppá spurningar um eitthvørt í Klaksvíkar kommunu.