Føroyaflokkur undir stovnan
Í løtuni fer fram fyrireikingararbeiði at savna inn undirskriftir til ein nýggjan politiskan flokk, ið fyrst og fremst skal varpa ljós á “órættvísu spælireglurnar og raðfestingarnar, sum tey smærru økini uttanfyri miðstaðin fáa”, sum Hjalmar Zachariassen, ein av stigtakarunum, orðar tað á Facebook.
Millum annað skrivar stigtakarin: “Tíðin er farin frá at landið skal sleppa at hava ein óendaligan hungur eftir pengum og pástanda at tey (nøkur fá fólk) duga best at deila hann útaftur. Vit síggja bara hvussu røsk tey eru at drála við lívshættisligum vegastrekkjum, meðan tey íverkseta eitt megaprojekt fyri og annað eftir.”
Hesin nýggi flokkurin undir stovnan heldur, at staðsetingin av almenna sektorinum í dag er órímilig, og millum annað mælir flokkurin til at spjaða almenn arbeiðspláss kring landið og at tøkugjaldið frá alivinnuni eigur at fara til kommunurnar.
Flokkurin vil vera við, at “Sjálvandi ber tað til at dagføra øll tey vandamiklu vegastrekkini í Føroyum, innanfyri fá ár. Politiska skipanin skal bara vilja tað.” Hervið sigur stigtakarin, at tá vit í Føroyum hava vegastrekki, sum eru vandamikil at koyra eftir, men sum bara liggja í órøkt ár eftir ár, so er tað ikki tí at tað er ógjørligt at dagføra tey, men tí at viljin hjá teimum í Løgtinginum og Landsstýrinum til at gera tað hevur verið ov lítil.
Flokkurin skal eftir ætlan eita Føroyaflokkurin, og fer nú undir at savna tær neyðugu 800 undirskriftirnar, sum skulu til.