Í døgunum upp undir vikuskiftið hevur kjakið enn einaferð tikið seg upp um at geva Kringvarpinum (ella øðrum?) loyvi at stroyma fótbóltsdystir í bestu deildini. Trý fótbóltsfeløg nokta – EB/Streymur, Argja Bóltfelag og Klaksvíkar Ítróttarfelag. Sambært vikuskiftissosialinum hevur formaðurin í KÍ roknað seg fram til, at missurin er umleið 8.000 krónur í mistum áskoðarainntøkum, og vil hann fegin hava, at Kringvarpið kompenserar fyri hetta.

Kringvarpsstjórin sigur hinvegin, at tað er sera ósannlíkt, at KvF fer at gjalda fyri at vísa dystirnar. Hann fer enntá so langt sum at siga, at tað at feløg nokta, kann hava við sær, at KvF gevst við at stroyma dystir í heila tikið. Formaðurin í KÍ sigur hinvegin, at tað sum teir í KÍ ynskja er bert, at teir ikki hava fíggjarligan miss av at KvF stroymar.

Eitt gott kompromis hevði tí kunnað verið, at Kringvarpið bjóðaði seg fram til at stroyma dystirnar í fremstu kvinnudeildini. Hesir dystir hava vanliga ókeypis atgongd, og tí eru feløgini ikki fyri nøkrum fíggjarligum missi av stroyming. Somuleiðis eru færri áskoðarar til hesar dystirnar enn teir í mansdeildini, so tørvurin á “áhuga og fleiri áskoðarum”, sum KvF sigur stroymingina viðføra, er størri her.

Fingu vit á hendan hátt økt um áhugan fyri kvinnudystunum, eins og fingu fleiri áskoðarar at fylgt við, tá tær spældu, so var hetta samstundis ein sigur á leiðini til at fáa meira javnstøðu í ítrótt. Sponsorar høvdu uttan iva eisini fingið eyguni upp fyri kvinnudystunum og sæð potentialið í at stuðla teimum, eitt nú við lýsingum.

Talan hevði sostatt verið um win-win, um Kringvarp Føroya fór at stroyma dystir í bestu kvinnudeildini. Win-win-win, um vit taka javnstøðusøkina við.