Hvalurin til Føroya Sjómannadag í ár kom hann frá eysturoyingum
Frá okkum, sum skipa fyri Føroya Sjómannadegi, skulu eysturoyingar fáa eina stóra tøkk og heilsan fyri hvalin, sum vit fingu til Føroya Sjómannadag.
Hvalurin er nú lagdur í ein frystikontainara, har hann verður liggjandi til í august, tá sjómannadagarnir fara av barkastokki. Hvalurin verður brúktur av Grindamannafelagnum til undirvísing í, hvussu hvalur verður skorðin upp.
Framsýningin verður eisini tulkað til enskt, soleiðis at ferðafólk, ið eru á Sjómannadegnum, eisini hava møguleika at kunna seg um hetta tilfeingi okkara.
Karl Johansen, sýslumaður eigur eisini eina stóra tøkk fyri vælvildina. Hann hevur, allastaðni har hann hevur skift grind, spurt seg fyri hjá grindamonnum um ein hval á hvørjum ári til sjómannadagin. Grindaformenn kring alt landið hava verið sera beinasamir, og hava sæð týdningin í at Føroya Sjómannadagur hevur havt frálæruna í uppskering av grind á skránni á hvørjum ári.
Flestu hvalirnir til Føroya Sjómannadag er komnir úr Norðoygjum, men eitt nú úr Havn, Hvalvík, Gøtu og aðrastaðni hevur hetta beinasemið verið víst Føroya Sjómannadegi, og tað takkar Sjómannadagurin fyri.