Tað er ikki sjáldan, at Poul Michelsen er frammi í fjølmiðlunum, men tað er sjáldan, at tað snýr seg um sjálvbjargni. Í Degi og viku 29. juni var tað um skeinkistøð. Kaga vit á heimasíðuna hjá Uttanríkismálaráðnum, so eru tíðindi har um eitt nú Filmshús, føroysku sílini, taraaling, og so ein rúgva av fundum og ráðstevnum, sum landsstýrismaðurin hevur verið á. Ongin yvirtøka er í eygsjón, hóast tað í samgonguskjalinum verður staðfest at útlendingamál og loftrúmið skulu yvirtakast í hesum valskeiðnum - hesi bæði sortera undir uttanríkis- og vinnumálaráðnum. 

Hví skal Danmark hava skolurnar?

Hvat verður við loftrúminum? Tað hevur verið grýtuklárt til at yvirtaka í fleiri ár, men onki hendir. Og hvat við sjóverjuni? Tá Sea Shepherd gjørdi um seg í Føroyum fyri nøkrum fáum árum síðani, ja, tá máttu donsk verjuskip, danskar verjutyrlur og marinarar so pent taka sær av teimum. Og allar skolurnar frá altjóðasamfelagnum og enntá úr Hollywood, ja, tær regnaðu yvir Danmark, sum ikki hevur dripið ein einasta hval.

Hetta er ikki nóg gott. Vit eiga at taka ábyrgd og fáa alt, á føroyskar hendur og tað sum skjótast. Men viljin tykist ikki vera til staðar. Tað er sjálvandi greitt, at Sambandsflokkurin ikki er við uppá nakra yvirtøku, men hann situr ikki við ræðið. 2 av 3 samgonguflokkum eru loysingarflokkar, men har hendir millum lítið og onki, uttan tá Innlendismálaráðið (!) ger ein vørr.

Nógv prátað, lítið handlað

Norðoya Tjóðveldisfelag átalar, at Norðlýsið hevur kritiserað vantandi viljan til sjálvbjargni í samgonguni og í Tjóðveldi. Tey føra fram, at “fleiri stig eru tikin seinastu árini móti at fáa ein sjálvbjargnan búskap, sum er altýðandi á leiðini fram til loysing”, uttan tó at siga hvørji hesi stigini eru. Um tey meina við einsamøllu yvirtøkuna hjá Sirið Stenberg, so er hon altso ikki “fleiri stig”. Eitt stig er hon tó, tað er rætt og tað hava vit róst landsstýriskvinnuni fyri í fleiri umførum. 

Í viðgerðini av stjórnarskipanini bleiv kritiserað, at so nógv varð tosað, og so lítið handlað. Tað er júst tað sama við yvirtøkunum. Vit síggja nógv føgur orð, ivaleyst eru nógvir fundir hildnir, og í stevnuskráunum hjá Tjóðveldi og Framsókn er sjálvbjargni og sjálvræði nærum altavgerandi. Men tá tað kemur til at seta handling aftanfyri føgru orðini, ja, so fáa øll kaldar føtur.

Tað er ikki stuttligt at vera loysingarmaður, tá so lítið hendir á sjálvbjargniskós, hóast tveir fullveldisflokkar sita í Landsstýrinum og vit liva í bestu fíggjarligu tíðum á Føroya landi nakrantíð. Blokkurin er gamaní fastfrystur, men átti at verið hólvaður niður á 0.

Norðoya Tjóðveldisfelag hevur tó rætt í, at tað ikki er beint at leggja eftir Tjóðveldi einsamøllum. Tjóðveldi hevur í minsta lagi framt yvirtøkur hetta valskeiðið. Men taka vit so Framsókn, so hevur flokkurin als onga yvirtøku framt. Vit kundu hóskandi spurt, um Framsókn ikki fremur nakra yvirtøku, tá flokkurin situr í Landsstýrinum og enntá við uttanríkismálum, nær ætlar flokkurin so at gera nakað munagott á sjálvbjargniskós?