Fyri 26 árum síðani spældi KÍ fyri fyrstu ferð í Europa, og tað var samstundis fyrsta føroyska liðið, sum luttók í Europa. Ávegis til Vilnius, har KÍ spælir hóskvøldið, so steðgaði Fríðin Ziskason í Riga saman við øðrum KÍ viðhaldsfólkum. KÍ spældi í 1992 í Riga móti Skonto Riga og millum leikararnar, sum spældu allan dystin, var Fríðin Ziskason.

- Eg minnist, at vit taptu 3-1 fyrra dystin í Føroyum, men trúðu fult uppá tað til seinna dystin. Tað var eisini ein dystur, har vit vóru væl við, men teir fingu nøkur snarálop og vunnu dystin 3-0, sigur Fríðin Ziskason.

Deyðbóltar eru avgerandi

Fríðin Ziskason hevur góðar vónir til KÍ hóskvøldið móti Zalgiris Vilnius, hóast KÍ tapti 2-1 í fyrra dystinum.

- Í altjóða fótbólti í løtuni hava deyðbóltar sera avgerandi týdning í nógvum dystum. Eg vænti, at KÍ kann fáa okkurt mál, og tað snýr seg um ikki at gevast, um Zalgiris Vilnius skorar eitt mál. Kenslan er góð, sigur Fríðin Ziskason, sum væntar, at KÍ vinnur dystin hóskvøldið.