Sjavs í Parlamentinum
- Hetta heldur lívið í okkum, at hittast kring eitt borð at spæla sjavs. Her loysa vit allar trupulleikar og hugna okkum óført, sigur Karl Isaksen ein av oddamonnunum í Parlamentinum
Hvønn dag er Parlamentið - t.e gamla Havnaskrivstovan, sum í dag er bygningur hjá Klaksvíkar Havn - karmur um sjavs, har eldri menn savnast at taka nakrar krossar og hugna sær saman. Teir tosa um tað sum rørist í Klaksvík, Norðoyggjum og Føroyum - bæði álvara og gaman.
Í dag eru tað teir yngri imóti teimum eldru, tí Anker og Vagn eru báðir 71 ára gamlir, ímeðan Páll er 82 ár og Karl 88 ár. Karl er liðskipari. Hann møtir kl. 13 at lata hurðina upp, hevur eina kannu av kaffi við og eisini okkurt søtt. Síðani koma hinir so líðandi. Tað eru skiftandi fólk, vanliga gongur eitt borð.
Teir minnast aftur til dagar, tá Ressi, Adolf Viðbjørg og Bjarni Christiansen vóru í velmaktini. Vit spældu í suðurendanum í húsunum her. Tað var fyrst í 90'unum upplýsir Anker.
- Vit plagdu at spæla til Dagur og Vika kom, so fóru vit heim til ein náttúrabita og fóru so oman aftur at spæla aftaná tíðindasendingina. Oftani koyrdu fýra borð, sigur Páll.
Teir eru spentir til Sjómannadagin, sum verður leygardagin 18. august. Teir sita á fyrstu parkett og fáa allan hugnan við.
- Vit fingu Fish&Chips bornan niðan frá Hanus í fjør, tað smakkaði fantastiska væl, tað eru vit takksamir fyri, sigur Anker at enda.
Løtuna Norðlýsið vitjaði mundi ganga javnt á. Okkurt 7 meld, men volaðir blivu ongir. Tað er eingin ivi um at sjavsurin í Parlamentinum er við til at halda lívsgóðskuna uppi hjá hesum eldru monnunum.