Tá ið lesarin situr við hesi útgávuni av Norðlýsinum í hondini, hava tvey tey fyrstu tiltøkini á Sjómanna­degnum longu verið. Byrjað varð longu mánakvøldið í Gamla Seglhúsi, har grannskoðarafyritøkan NUMO greinaði fíggjarligu støðuna hjá húkaflotanum, og í gjárkvøldið greiddi Bogi Jacobsen frá endurbyggingini av uppisjóvarvirkinum á Tvøroyri. Jógvan Skorheim, borgarstjóri greiddi síðani frá framtíðini í fiskivinnuhøvuðsstaðnum.

Hóast leygardagurin er sjálvur Sjómannadagurin, og megin­parturin av øllum tiltøkunum liggur har, er størsta einstaka tiltakið helst Fiskivinnutingið, ið verður í Miðhøllini á Skúlatrøð í kvøld kl. 19. Her hittast allir sjey floksformenninir í politisku flokkunum at kjakast um fyrstu royndirnar av fiskivinnunýskipanini. Buzzorðini verða ivaleyst Menningarkvotur og politisk útlutan. Norðlýsið stroymir fundin beinleiðis á heimasíðu okkara.

Hósdagin verður spennandi fyrilestur í Betri har danin Thorbjørn Hendil fer at greiða frá tá hann datt fyri borð og rak einsamallur í sjónum í næstan eitt heilt samdøgur, og fríggja­dagurin býður so uppá fiskikapping og vatnkríggj, ið eru vorðin tvey av teimum heilt stóru tiltøkunum á Sjómanna­døgunum. Einki bendir á at hesi fara at standa nakað aftanfyri undanfarin ár.

Leygardagurin er sjálvur Sjómannadagurin. Dagurin byrjar longu klokkan 9, tó at formliga setanin er kl. 10:45, har borgarstjórin fer at bjóða vælkomin og fiski­mála­ráðharrin setir dagin. Fleiri framsýningar, bæði á landi og umborð á skipum, lata upp kl. 11 og verða opnar til út á seinnapartin.

Ongum nýtist heldur at ganga svangur á Sjómannadegnum. Risarnir í føroysku fiski- og alivinnuni, JFK, Christian í Grótinum og Bakkafrost, bjóða ávikavist fish & chips, makrel og laks, borðreitt á forkunnugar hættir. Sjómannadagurin sjálvur bjóðar samstundis feska grind; tvøst, spik, eplir og sterkan sinnopp. Óansæð hvønn sjómat einum dámar best, ella um ein vil royna allar rættirnar, er alt púra ókeypis.

Tað verður ov rúgvusmikið á hesum plássi at nevna alt í skránni, so nóg mikið man vera at siga, at skráin væl og virðiliga stendur mát við skránna undanfarin ár. Punktum­mið verður sett í Christianskirkjuni sunnudagin, har Hanus á Gørðum sóknarprestur prædikar. Umboð fyri sjóverjuskipini Brimil og Hvidbjørnen hava upplestur. 

Føroya Sjómannadagur er fyrst og fremst eitt tiltak til heiðurs fyri føroyska sjómanninum. Tiltakið er ópolit­iskt í tann mun, at eitt ynski um at vísa politikarunum á tann ovurstóra týdningin, sum sjómaðurin og fiskivinnan hava fyri føroyska samfelagið, er tað einasta politiska, sum fyriskipararnir leggja fyri dagin. Restin snýr seg um at heiðra fiskimannin á ein virðiligan og uppibornan hátt. 

Øll tiltøkini eru ókeypis og rúsfrí.. Øll eru væl­komin, og royndirnar vísa, at gestirnir duga framúr væl at gera dagarnar læruríkar, stuttligar og til ein sømiligan fagnað av føroyska sjómanninum.

Norðlýsið ynskir øllum vælkomnum á Sjómannadag(ar)!