Alt byrjaði við, at Gunvá við Keldu helt varaborgarstjóran vera so hugmóðiga, vegna viðmerkingina um tær góðu sosialu skipaninar vit hava í Føroyum.

Yvirskriftir sum “Fiskivinnan tekur livibreyðið frá 25 familjum” gera ilt hjá øllum. Sjálvandi ynskir eingin tað. Tí kom mín viðmerking. Tó sigur Gunvá við Keldu, í grein fyri døgum síðani, seg gleðast um tær samhaldsføstu skipaninar vit hava í Føroyum. Men í verki er hetta so ikki nakað, sum vit hava sæð serliga nógv frá Fólkaflokkinum.

Tá ið Gunvá við Keldu endar grein sína við: “Tað er umráðandi, at tey ið stjórna, til eina og hvørja tíð, føra ein politikk ið megnar at fáa føroyska borgaran úr ALS og ikki førir politikk, soleiðis at borgarar enda í ALS.” má eg spyrja: “Hvat billar tú tær inn?” Heldur tú veruliga, at nøkur samgonga – vinstravend ella høgravend – ætlar sær at føra politikk, sum førir borgarar í ALS, og ikki úr ALS?

Eg kann vísa til tøl frá Hagstovuni sum vísa, at í 2017 vóru 3252 lønmóttakarar í Føroyum, í mun til 3043 í 2015. Og henda framgongd er eisini at síggja í Norðoyggjum. So neyvan er nøkur duld politisk dagsskrá frá hesi samgonguni um, at fáa fleiri borgarar í ALS.

“You cannot strengthen the weak by weakening the strong” er ein politisk ideologi, sum vit ikki eru samdar um. Havi ongantíð sagt antin ella. Vit skulu hinvegin hava bæði vinnulív, kommunalt og alment virksemi. Tað gagnar øllum samfelagnum best, og tað gagnar øllum fólkinum best. Hetta prógvar fólkavøksturin og framburðurin í Klaksvíkar kommunu seinastu árini so sanniliga eisini.