Norðsøki hevur verið ein royndartúr við snellu, áðrenn teir fara at leggja um til línu. Norðsøki hevur í summar verið undir Íslandi við snellu. Árni Zachariasen, ið er við Norðsøka sigur, at fiskiskapurin hevur ikki verið góður. Tá vit tosaðu við Norðsøka í morgun, lógu teir á "býttuleið" sunnanfyri og royndu. Vit byrjaðu hódagin sunnanfyri Mykines. Tann dagin fingu vit 3000 pund, næsta dagin fingu vit 1500 pund. Síðani hava vit roynt frá Barinum og eystur um Fugloynna og nú eru vit sunnanfyri.

Fiskurin vestanfyri var sera feitur. Livurin í honum var stór og magin stóð at spreingjas av nebbasild. Her, norðanfyri og nú sunnanfyri er fiskurin eisini væl fyri, men her er meira blandingsæti í maganum, krabbi, krossfiskur og nebbasild, men fiskurin her er eisini í góðum standi.

Vit munnu hava eini 8000 pund inni í dag, helst fara vit at royna morgindagin afturat áðrenn báturin fer at leggja um til línu, sigur Árni Zachariassen at enda.