Tróndur Arge og Giza Hoyvík sendu KÍ av oddasessinum
KÍ misti í dag oddasessin í 1.deild.
KÍ vitjaði í dag Giza Hoyvík, sum liggur næstaftast í 1.deild og nærkast 2.deild. Giza Hoyvík hevði undan dagsins dysti bara vunnið tríggjar av 21 dystum. Men hóast KÍ var væl mannað við leikarum, har teir flestu høvdu royndir úr bestu deildini, so var tað Giza Hoyvík, sum púra óvæntað vann 3-0. Kendi frásøgumaðurin í Miðlahúsinum og FSF varpinum, Tróndur Arge, spælir til dagliga við Giza Hoyvík og hann spældi ein høvuðsleiklut og skoraði málið til 1-0.
Tá ÍF vann sín dyst 6-0 móti TB/FCS/Royn, so merkti hetta, at ÍF legði seg á odda í deildini, tvey stig frammanfyri KÍ á 2. plássi, nú 22 umfør eru leikt. Fyri nøkrum umførum síðani var KÍ 11 stig frammanfyri ÍF. Giza Hoyvík liggur framvegis á 9. plássi. Nú við 17 stigum. Fimm stig eru upp til Skála á 8. plássi.