Ódnin Helena
8nda navngivna tropiska illveðrið í 2018 er í dag statt einar 500 fjórðingar ein útsynning úr Írlandi (sí myndina).
Veðurfrøðingar løgdu illveðrið til merkis, sum eitt órógv fyri 10 døgum síðan. Tá var tað statt beint úr strondini í Senegal og Guinea. Nógv megi var í órógvinum, og tað tóktist at menna seg alla tíðina. Tað fekk navnið Helena.
Áðrenn Helena fór til stroks út yvir hav, oysti hon regn niður í Guinea, so at fleiri fólk doyðu.
Hon fór fyrst beint vestureftir – nakrar 100 fjórðingar – og síðan snaraði hon norðureftir ímóti Evropa.
Har Helena er nú, er havið ov kalt, at hon klárar seg sum tropisk ódn ella tropiskur stormur. Eisini er køld luft blandað uppí ta heitu, so at hóast tropiska upprunan, so fer hon at uppføra seg sum eitt vanligt lágtrýst um okkara leiðir.
Hon fer at seta sín dám á veðrið í Føroyum serliga mikudagin og hósdagin. Tá fer køld luft av landnyrðingi og útnyrðingi at reka fram við Føroyum niður ímóti bretsku oyggjunum.
Fríggjadagin eru restirnar farnar norðurum og burtur frá okkum.