Tunnilsdagurin minnir okkum norðoyingar á bummgjaldið, ið ikki vil fara vekk. Hetta er fyrstu ferð í søguni, at Landsstýrið hevur kravt eina íløgu, sum Landskassin hevur goldið, goldna aftur.

Hendan samgongan hevur sagt, at hon vil hava alt landskassainnskotið aftur, áðrenn tunlarnir verða ókeypis. Við øðrum orðum skal bummgjald fíggja tað, sum skatturin longu hevur fíggjað.

Norðoyingar eru tó ótroyttiligir og elska at skapa, hóast mótgongd. Klaksvíkar Handilsfelag er limafelagið hjá útvið 30 handlum í Klaksvík. Tey gera sum vant nógv burturúr tunnilsdøgunum.

Hesaferð er serligt fokus á bindiklubbar. Vit hyggja at einum kendum bindiklubba í Klaksvík, har flestu kvinnurnar hava verið vinkonur sín barndómsárini. Vit seta bindiklubbar undir luppin, og frætta meiri um hesar hjá einum miðnámssskúlalærara.

Serstøk kapping er á facebook-vanganum hjá Klaksvíkar Handilsfelag, har til ber at vinna eitt gávukort á 2.500 kr. hjá ávíkavist Café Fríðu, Jacqson ella hjá Jórun. Eftir tilmeldingunum at meta, so er stór undirtøka fyri hesari kapping. Einasta treyt er at senda inn eina bindiklubbamynd og tagga onkra aðra kvinnu, úr onkrum øðrum bindiklubba. Vit prenta nakrar av myndunum í dagsins blaði. Skundið tykkum, tí drigið verður fríggjakvøldið!

Blaðið er á tremur við handilslýsingum og tað er einki at taka seg aftur í, at øll vitjandi hava nógv í væntu. Hinvegin eru eisini aðrar lýsingar, ið rætta seg eftir fólki, sum koyra vestureftir.

Norðlýsið hevur prenta søguna hjá Realinum í drúgva tíð. Í dagsins blaði verða síðstu orðini prentaði, vit hava verið fegin um at prenta hesa lýsing hjá Óla E. Heinesen av samtíðarvinnusøgu føroyinga.

Leygardagin er tað bert ókeypis at koyra í Norðoyatunlinum, ikki í Vágatunlinum. Flestu handlar fara at hava opið størsta partin av samdøgrinum, og spæla veðurgudarnir við, so verður nógv lív í býnum allan tunnilsdagin.

Norðlýsið ynskir øllum ein góðan tunnilsdag!