Vit eru komin í helvt við bólkaspælinum í Nations League og higartil hevur alt gingið, sum veddingarfyritøkurnar høvdu mett. Kosovo og Aserbadjan hava verið ov sterk fyri Føroyar, meðan Malta er veikasta liðið í bólkinum.

Skal vónin um at koma víðari úr bólkinum liva til teir báðar dystirnar í november, so krevst ein sigur ímóti Kosovo í dag. Tapa Føroyar, so er talan um triðja tap á rað, harav tvey á heimavølli og tá kann spurnartekin setast við menningina hjá landsliðnum í 2018. Vit hava eisini ofta sæð, at í seinna dystinum, tá tveir vera leiktir innan fáar dagar, so dalar avrikið nógv í seinna dystinum. Tí er kanska løgið, at landsliðsvenjarin bara hevur valt at gera tvær broytingar, sambært in.fo, tá hesin trupulleikin er so væl kendur. Men við einum góðum avriki, so verjir ta hesa avgerð, meðan eitt minni gott avrik fer at seta spurningar, um tað ikki átti at verið gjørt pláss fyri fleiri úthvíldum leikarum frá byrjan.

Dysturin á Tórsvølli í dag byrjar kl. 17.00.