Dansa við deyðans grindir
Stórthundrað yrkingar á 100 ára degnum 5. nov. 2018, sigur “Orð og løg”.
Tað gleðir okkum almikið at kunna boða tykkum frá, at yrkingarsavnið Dansa við deyðans grindir eftir Regin Dahl nú er komið út og fæst til keyps í bókabúðunum.
Hetta eru úrvalsyrkingar eftir skaldið úr øllum hansara yrkingarsøvnum, frá tí fyrsta til tað seinasta, stórthundrað yrkingar til samans. Umráðandi hevur verið, at øll høvuðsevnini eru umboðað í úrvalinum.
Umframt yrkingarnar er í bókini ein stuttur tekstur um skaldið, sum Guðrun Gaard hevur skrivað.
Undirskundandi høvi til útgávuna júst nú er, at tann 5. november í ár eru 100 ár liðin, síðani Regin Dahl var føddur.
Regin Dahl var eitt av føroysku stórskøldunum í undanfarnu øld.
Hann var bæði orðaskald og tónaskald.
Orðaskaldið sæst aftur í tónunum, og tónaskaldið speglar sær í orðunum.
Bókin er eitt frálíkt høvi at kunna seg um megintáttin í skaldskapinum og lesa hann samanhangandi í eini og somu bók.
Forlagið Orð og løg var í síni tíð stovnað til at geva út listarlig avrik eftir Regin Dahl í orðum og tónum.
Dansa við deyðans grindir er 185 bls.
Staðið fyri úrvalinum hevur Heðin M. Klein saman við Hanusi Kamban, Guðruni Gaard og Halgiri Winther Poulsen, perma hevur Tóroddur Poulsen evnað til, og Sendistovan havt prentumsitingina um hendi.
Bókin fæst fyri 180 krónur í bókabúðunum.