Borgarstjórin fegnast um góðu undirtøkuna fyri Mentanarhúsinum í Klaksvík
Jógvan Skorðheim, borgarstjóri, sigur at líka frá byrjan hevur verið arbeitt við at fáa stuðul úr útlandinum til verkætlanina. Nú kunnu vit staðfesta at 9 milliónir krónir koma frá LOA Fondinum og somuleiðis 9 milliónir koma frá donsku stjórnini.
Tá eg tók við sum borgarstjóri vóru vit á fundi við LOA fondin í Danmark og eftir at vit høvdu kunnað tey um verkætlanina játtaði grunnurin 9 milliónir krónir til verkætlanina.
Forkvinnan í nevndini fyri Mentanarhúsið, Signhild V. Jóhannesen, hevur saman við fólkatingsmanninum, Sjúrður Skaale, arbeitt fyri at fáa stuðul frá donsku stjórnini eins og danska stjórnin stuðlaði byggingini av mentanarhúsinum ”Saltsiloin á Drelnesi”.
Eg fegnist stórliga at hetta arbeiði nú eisini hevur borið á mál og at tað hevur eydnast okkum at fingið tilsamans 18 milliónir krónir úr útlandinum til hesa góðu og týdningarmiklu verkætlan.
Sambært borgarstjóranum er verkætlanin mett at kosta góðar 50 milliónir krónir og eftir ætlan verður klárt at byrja byggingina longu komandi ár.