Kristina: Løgið at danir rinda almennar íløgur í Føroyum
Tað er komið dátt við hjá Kristinu Háfoss, at Sjúrður Skaale hevur fingið 9,5 mió. krónur til nýtt mentanarhús í Klaksvík
Kristina skrivar soleiðis á facebook, undir video broti sum Sjúrður Skaale hevur lagt á sín vanga:
Góði Sjúrður.
Tað hevði verið gott um Javnaðarflokkurin á Fólkatingi, samskiftið við Javnaðarflokkin í Landsstýrinum og Landsstýrið sum heild, áðrenn tílíkar avgerðir verða tiknar. Sum kunnugt hava Landsstýrið og samgongan sett sær fyri, at gera føroyska búskapin og samfelagið meira sjálvbjargin – eisini fíggjarliga. Tí er ríkisveitingin fastfryst, og er harvið minkað niður í 6% av samlaðu almennu inntøkunum í ár. Eisini verða fleiri heimtøkur framdar, og er persóns-, familju- og arvarættarliga økið heimtikið, og útreiðslurnar av hesum somuleiðis.
Sum kunnugt verður eisini arbeitt við føroysku fíggjarlógini fyri 2019 í hesum døgum. Tað tykist tí løgið, at frætta á Facebook at tú ætlar, at danska fíggjarlógin nú skal rinda fyri ávísar almennar íløgur í Føroyum komandi ár.
Tú ert sjálvandi altíð vælkomin at venda tær til føroyska Fíggjarmálaráðið og mín, um tú ynskir at umrøða fíggjarlógina í Føroyum fyri komandi ár.
Vh Kristina.