Norðlýsið hevur fingið fatur í skrivið, sum Áhugafelagið Nólsoyar Páls á Biskupsstøð hevur sent til býráðslimirnar.

Formaðurin í áhugafelagnum Archibald Black saknar fakligar grundgevingar fyri navninum Fagravík og heitir á býráðið um, at taka málið upp til nýggja viðgerð. 

Skrivið sæst niðanfyri:

Nú býráðið, eftir tilmæli frá gøtunavnanevndini, hevur samtykt at staðseta nýtt navn framman fyri hús Nólsoyar Páls á Biskupsstøð, vil Áhugafelagið Nólsoyar Páll mótmæla hesum.

Ein partur av verkætlanini ” Biskupsstøðgarðurin” er at leggja timbur á Biskupsstøðna. Biskupsstøðin røkkur umleið fimti metrar út á Vágna. Her verða ljós og mastur við vimpli ytst á Biskupsstøðni.

Soleiðis kunnu fólk aftur fara á støð.

Støð merkir bátastøð ella lending - atløga.

Fyrstu fólkini, ið búseta seg á Biskupsstøð, eru Nólsoyar Páll og Marin Malena.

Staðarnavnið Biskupsstøð stavar frá miðøldini.

Hálendskt heimskort frá 1600 vísir Føroyar við trimum nøvnum: Biskupsstøð, Tórshavn og Suðuroy.

Tá ið rættarmálið ímóti brillumanninum Baron von Hompech var fyri, var Nólsoyar Páll vitni í rættinum.

Í fleiri skjølum frá 4. nov. til 17. nov. 1808 í Admiralty Prize Court London stendur:

Poul Poulsen Nolsoe of Biskopstoe

Verkætlanin “Biskupsstøðgarðurin” byggir á søguna, tí gevur nýggja navnið “Fagravík” onga meining.

Vísast skal til, at gøtunavnanevndin ikki hevur fylgt reglugerðini, ið sigur: Nevndin skal hoyra persónar við servitan, miða móti nøvnum, sum hava uppruna í ella tilknýti til tey støð ella øki, ið verða navngivin.

Tað er eingin orsøk at broyta eitt søguligt navn á søguligum staði, og við orðum Nólsoyar Páls:

“Tað er mín vón, at tann góða sakin altíð at enda sigrar,” heita vit á býráðið, um at fáa hetta mistak rættað.

Vinarliga

Áhugafelagið Nólsoyar Páll