Seinastu dagarnar er kølin luft komin til okkara av leiðunum langt norðanfyri, tað hevur verið kalt í Føroyum.

Í morgin og eisini fyrrapartin í ovurmorgin er tað eitt sindur lýggjari luft úr Atlantshavi, sum kemur hendanvegin. Hitin 2-3 stig uppeftir.

Nú beint eftir middag er lítil og eingin vindur úr ymsum ættum – Føroyar liggja ímillum 2 hátrýst og 2 lágtrýst, hetta kalla vit fyri ein saðil.

Men saðilin verður trýstur eystureftir, og seinnapartin í dag fara vit fáa landsynning-eystan, og samstundis fer vindurin at veksa. Klokkan 18 eru væntandi einir 8 til 12 m/s.

Seint í kvøld ella á midnátt fer vindurin at veksa enn meiri – um 4 tíðina í nátt 13 til 18 m/s, og um 7 tíðina í morgin ári 15 til 20 m/s.

Eitt regnumráði fer at raka okkum í morgin ári, tá ið vindurin er mestur. Hetta er um 8-9 tíðina. Tað fer at liggja yvir okkum í nakrar tímar – til nakað eftir middag.

Tá ið tað er farið norðurum, støkkur ættin yvir í útsynning, og vindurin minkar niður í 8 til 12 m/s.