Norðlýsið skrivaði nógv um, hvussu skeiv skipan tað var at fara til, tá tað fyri nøkrum árum síðani bleiv avgjørt, at lutakast skuldi vera um 14. heimadystin í bestu deildini hjá monnum.

At avgera hetta við lutakasti ger, at liðini fáa ójavnar fortreytir ístaðin fyri sum tað var fyrr, tá topp 5 liðini øll høvdu eins fortreytir. Júst KÍ er liðið, sum hevur smakkað uppá, hvussu skeiv hendan skipanin kann vera. Hetta er triðju ferð, at lutakast er um 14. heimadystin. Bæði tey síðstu árini hevur KÍ skula havt lutakast móti sterkasta liðnum í botn 5 og øll trý árini hevur KÍ havt útidyst - sum einasta liðið í kappingini. 

Umframt at tað ítróttarliga vanliga er stórur munur á, at spæla t.d. á Skála og so á heimavølli, so er tað eisini fíggjarligur munur. KÍ hevur eitt miðal gjaldandi áskoðaratal á 500-600 áskoðarar og tí eru tað áleið 40.000 kr., sum KÍ á hvørjum ári hevur sagt farvæl til ímun til hesa nýggju skipanina. 

Av toppliðunum vóru HB, B36 og NSÍ liðini, sum í 2019 fingu 14 heimadystir. 

Landskappingin byrjar 10. mars, tá KÍ fær vitjan av meistarunum úr HB.