Tað sigur skiparin á útróðrarbátinum Bragd, nú tilmælið frá Havstovuni er komið út og lagt verður upp til royndarfiskiskap á Føroya Banka.

Eg haldi at tað var ein háðan ímóti okkum, sum liva av fiskivinnuni her heima, og sum hava royndir við at veiða við monufilamentllínu um summarið, at Slætnatindur fekk loyvi til royndarfiskiskap á Føroya Banka seinasta summar.

Bæði vit á Bragd og Líraberg søktu, men fingu nei. Manningarnar á hesum báðum bátunum liva av útróðri alt árið og vit á Bragd hava nú í eini fimm ár roynt við monofilamentlínu um summarið og hava tí royndir við hesum fiskiskapi. Líraberg hevur helst roynt við hesum reiðskapi longri enn vit.

Slætnatindur, ið fekk loyvi fram um Líraberg og Bragd, royndi eitt sindur við snellu í vár, men hevur als ikki verið í vinnu í vetur og vár, helst tí at teir liva av inntøku aðrastaðni frá.

Vit spurdu okkum fyri, hvør orsøkin var til, at teir fingu loyvi fram um okkum, men hava enn onki svar fingið, hóast tað var lovað okkum.

Afturat slíkari mótgongd, skulu nú eisini fiskidagar takast frá okkum, um farast skal eftir tí sum Havstovan kemur við. Havstovan, sum fyrst í 90-unum segði ósatt fyri okkum, er áhaldandi komin við upplýsingum, ið hava við sær, at vit, hava sera trupult  at taka útsagnir frá Havstovuni í álvara, sigur Oddmar Niclasen, skipari á Bragd.