Í kvøld rekur hann eystur um Føroyar, og tá er suðurættin aftur. Júst sum plagar. Í nátt fer vindurin at veksa úr suðuri og so landsynningi. Klokkan 4 í nátt eru ætlandi 15 til 20 m/s úr lágum landsynningi saman við nógvum regni.

Men so støkkur hann vesturum, og tað fer at slíta í.

Tá ið fólk fara til arbeiðis klokkan 8, eru 5 til 10 m/s úr útsynningi-suðuri og fyri tað mesta turt, men ælaveður í støðum.

Út á fyrrapartin fer at mala úr ymsum ættum; á middegi er høgættin aftur. 10 til 15 m/s av norði og aftur eitt sindur kaldari.

Seinnapartin í morgin veksur vindur eitt sindur – upp í 15 til 20 m/s, í løtum 18 til 23 m/s. Tað fer at minka aftur um nátturðatíð. Á midnátt er 5 til 10 m/s av vesturhallum norði.

Ælingar kunnu væntast allan dagin.