Veðrið í vikuskiftinum
Norðan restina av degnum í dag og í morgin. Sunnudagin útnyrðingur-norðan.
So tað er køld luft av Norðpólinum, sum rekur til okkara alt vikuskiftið.
Tað er ikki nógv at skriva um ættina í vikuskiftinum. Hon er mestsum tann sama alt vikuskiftið.
Tað sama kann ikki sigast um vindferðina. Hon verður als ikki tann sama hetta vikuskiftið.
Restina av degnum í dag og til fyrrapartin í morgin fer vindferðin at vera 8 til 13 m/s. Í støðum eitt sindur meiri. Ælingar við regni ella vátakava kunnu væntast í støðum alla tíðina. Hitin fyri restina av degnum í dag fer at liggja um 2 til 4 stig.
Fyrrapartin í morgin fer vindur at veksa av norði. Á middegi eru 13 til 18 m/s; um nátturðatíð 18 til 23 m/s. Út á kvøldið minkar aftur eitt sindur. Á midnátt eru 15 til 20 m/s.
Allan dagin í morgin fara vit at merkja ælingar við vátakava ella kava. Hitin í morgin fer at liggja úr frostmarkinum og nøkur stig uppeftir.
Sunnunátt, -morgun og -dag minkar vindurin alla tíðina eitt sindur. Seint seinnapartin er komið niður í 5 til 10 m/s. Ælingar sunnudagin, men ikki so títtir sum leygardagin.
Hitin sunnudagin fer eisini at liggja úr frostmarkinum og 3-4 stig uppeftir.
Gott vikuskifti.