Smáu útoyggjarnar hava ikki somu raðfesting sum onnur øki í landinum, tá tað kemur til ferðasamband. Tað mugu fugloyingar og svínoyingar enn eina ferð staðfesta, nú ferðasambandið verður lagt lamið, tí skrúvan á Rituni hevur fingið skaða.

Strandferðslan sigur á heimasíðuni, at “Meira kunning verður tøk seinni, nær siglingin verður tikin upp aftur”, og hetta stendur framvegis nú, tvey samdøgur eftir óhappið. Í tíðindasendingini í útvarpinum kl.  18 fekk Kringvarpið tó fatur á tøkniliga stjóranum, Jóan Petur Abrahamsen, og tann vegin eydnaðist at fáa uppspurt, at Súlan verður sett inn á farleiðina, og at byrjað verður at sigla mikudagin.

Tyrlan flýgur til Fugloynna mánadag um sumrarnar, men hesin túrurin er ikki í vetrarhálvuni, so í dag og í morgin eru fugloyingar og svínoyingar heilt avskornir frá sambandi við umverðina.

Tað tykist tí sum vantandi virðing fyri útoyggjafólki, at so mong samdøgur ganga, frá tí at eitt óhapp hendir og til handlað verður. Tað er sín søk, at tað tekur sína tíð at klárgera Súluna, men ein eyka tyrlutúr mátti Strandferðslan kunnað boðið. Umframt tað sjálvsagda í at havt leypandi dagførda kunning á heimasíðuni.

Skermmynd tikin av ssl.fo mánakvøldið 28. januar kl. 21:22. Har stendur framvegis “í dag” tveir dagar seinni, og onki verður nevnt um loysnina við Súluni.