Avgreiðslubilur kemur ikki vegin fram
Á ferjuleguni í Klaksvík hevur ein avgreiðslubilur hjá Strandferðsluni, ið skal út til Svínoyar, staðið í fleiri mánaðir. Bilurin sær nýggjur og snøggur út, men svínoyingar eru farnir at spyrja hvussu Strandferðslan sær fyri sær, at ein bilur á ferjuleguni í Klaksvík gagnar Svínoynni.
Onkur sigur 2 mánaðir, onkur annar sigur 4 mánaðir. Kjakið koyrir í almenna Facebook-bólkinum “Svínoyingar” um, hví ein avgreiðslubilur hjá Strandfaraskipum Landsins ikki kemur leiðina fram út í Svínoynna, har hann skal brúkast. Hvussu er og ikki, so hevur bilurin nú staðið leingi har, og fólk eru farin at ótolnast eftir, at hann verður tikin í brúk.
Eftir kjakinum at døma er bilurin strandaður í Klaksvík, tí ongin er at koyra hann. Tosað verður um vantandi krana-sertifikat, vantandi stórt koyrikort, og onkur nevnir møguleikan fyri at umskráseta hann til traktor, soleiðis at starvsfólk hjá Strandferðsluni kunnu koyra hann. Spurningurin er so um tað er loyvt, tí vigar bilurin meira enn 3.500 kg, so skal framvegis stórt koyrikort til at kunna føra hann.
Mong tykjast halda, at Strandferðslan við hesum hevur keypt “katten i sækken”, tí bilurin ikki er egnaður til sítt endamál. Tað er ikki greitt, um hetta er rætt, men tað at hann hevur staðið stillur í mánaðir kundi bent á, at so er.