Poli Mikkelsen hevur verið lærari á Klaksvíkar Sjómansskúla, sum nú eitur Sjónám í samfull 32 ár. Hann var settur í starv har í 1987 og var stjóri á skúlanum frá 1992 til 2011.

Poli hevur verið sera umhildin sum undirvísari og stjóri, og nógvu talurnar í dag bóru eisini boð um tað sama. Sum vera man, so hava næmingarnir á Sjónámi havt heimstað kring alt landið, og tað boðaði uppmøtingin til fráfaringarløtuna á skúlanum í dag eisini. Úr Vinnuháskúlanum helt Símin Poulsen røðu og takkaði Pola fyri gott samstarv, bæði sum undirvísari og eisini sum samstarvspartnari: "Vit á Vinnuháskúlanum, seta sera stóran prís upp á samstarv", segði Símin millum annað. Rúni Heinesen, Hans Eli Hansen,  Hanus Kjølbro og Bogi Gardar, skúlastjóri á Sjónámi, sum eisini handaði Pola eitt sera vakurt ur, sum Dávur Allan Nielsen hevur sniðgivið og latið framleitt. Eisini fekk Poli Mikkelsen ein málning av Klaksvík, ið Regin Jørgensen úr Sørvági hevur málað.

Vit á Norðlýsinum ynskja Pola Mikkelsen, fyrrv. sjómansskúlalærar góðan byr framyvir og siga takk fyri gott samstarv í farnu tíð.