Lýsing

Rebekka á danska/íslendska landsliðið!

SKRIVAÐ: Frælsur Ítróttur Føroya  |  07.02.2019 - 21:08 Ítrottur Tíðindi

Sunnudagin verður norðurlendskur landsdystur innandura. Vanliga hevur hetta verið kapping millum Svøríki, Finnland og Noreg, men síðani 2015 hevur eitt fjórða landslið – Danmark/Ísland – eisini verið við.

Kappingin er soleiðis skipað, at hvørt landslið hevur tvey umboð í hvørjari kapping. Danska/íslendska liðið verður úttikið soleiðis at tað er so sterkt sum gjørligt. Danir eru nakað væl sterkari enn íslendingar í frælsum ítrótti, og tí er bert ein íslendingur komin á mansliðið, meðan fimm íslendskar kvinnur eru úttiknar, m.a. stórrennarin Anita Hinriksdóttir, sum verður við á 800 metrum.

Í løtuni liggur Rebekka ovast á danska 2019-styrkilistanum á 1.500 metrum, og hevur Dansk Atletiforbund (DAF) tí spurt Rebekku, um hon er sinnað at umboða Danmark/Ísland á nevnda teini. Tað hevur Rebekka játtað, og í morgin fer Rebekka til Danmarkar, hagani hon leygardagin saman við samlaða danska hópinum ferðast til Oslo, har kappingarnar verða.

Úrslitini hjá Rebekku seinnu tíðina hava skarað framúr, og tí er ikki undarligt, at hon nú gjørdist danskur landsliðsíðkari. Síðani Rebekka vann gull á oyggjaleikunum á 800 m á Gotlandi í 2017, hevur hon tvær ferðir vunnið gull á 1.500 m á stóru stevnuni Pallas Spelen í Malmø, seinast so seint sum fyri 14 døgum síðani. Hon hevur vunnið tvífalt gull á 800 og 1.500 til Stórmót IR í Reykjavík, og hon er í løtuni danmarkarmeistari á 1.500 metrum.

Fyri skjótt 10 árum síðani fekk Rebekka sína fyrstu uppgávu á føroyska A-landsliðnum til oyggjaleikirnar í 2009. Nú í 2019 eru boð eftir henni frá danska A-landsliðnum.

Hetta er ikki árstíðin, har Rebekka rennur skjótast. Tí var hon serliga fegin, tá hon næstseinasta vikuskiftið vann Pallas Spelen við 4.32,77 bert góð trý sekund frá sínum føroyska innandurameti. Mótstøðan sunnudagin verður ein heilt onnur enn Rebekka er von við. Tær allarflestu av hinum hava tíðir, sum eru góð 10 sekund undir føroyska metinum.

Vit kunnu tó vóna, at Rebekka rennur upp til sítt allarbesta. Ger hon tað, verður hon helst væl við allan vegin, og eigur at hava møguleika at basa tí einu finsku kvinnuni og sínum danska liðfelaga Line K. Schultz, sum fyrr hevur umboðað Danmark til EM í U20 og U23 og sum vann NM á 3.000 m fyri U20 í 2014.

Tað verður møguligt hjá okkum her heima at fylgja við beinleiðis. Atletik Live fer at senda, og áhugað kunnu fara inn á HESA SLÓÐINA at hyggja. 1.500 metra renningin hjá kvinnum er sett til 15.15 føroyska tíð. Norðurlandadysturin byrjar annars kl. 13.30, men stangarleypararnir byrja longu kl. 13.00

Frælsur Ítróttur Føroya ynskir Rebekku hjartaliga tillukku við úttøkuni og bestu eydnu við kappingini!

Lýsing
Seinastu tíðindini
Takk fyri eitt fantastiskt summar
Iacta alea est
Vit hava áræði og dirvi at møta avbjóðin…
KÍ misti stig á Djúpumýri í kvøld
Hetta er nakað vit síggja fram til hvørt…
Kristian Martin: - Hetta er orduliga stu…
Gadus fiskur í heimsflokki
Hanus: Vit standa so leingi sum fólk vil…
Kristin verður á listanum hjá Sjálvstýri
Havi ikki hoyrt so skapt
Enn ein kvinna á listanum hjá Sjálvstýri…
Anfinn Hansen vann egnikappingina
Einki hent í 35 ár. Hvussu leingi skul…
Sjálvandi skal hjúnabands­lógin broytast…
Hampulig fótbóltslíkindi í kvøld
Hesir bátar/­skip fiskaðu mest í 2018
Hesi vunnu fiski­skappingina
Nógvir og stórir vinningar á Sjómannadeg…
Fiski­kapping og vatnkríggj á í dag
KUNNING UM FERÐSLU Á SJÓMANNA­DEGNUM