Føroysk umboðsstova í Jerusalem?
Tað vóru gleðiligt tíðindi at frætta í fjølmiðlunum, at formaðuri Jenis av Rana á landsfundi Miðfloksins hevði boðað frá, at uppskot Miðfloksins var at seta føroyska umboðsstovu á stovn í Jerusalem.
Fyri meg, sum havi ferðast í ár so mong, sum ferðaleiðari í Ísrael við so mongum føroyingum, vóru hetta sera kærkomin tíðindi. Eg ivist einki í, at mong onnur í Føroyum gleðast um fráboðan Miðfloksins. Vónandi fer uppskot um umboðsstovuna at fáa góða undirtøku á tingi.
Ísrael er millum fremstu lond heimsins í hátøkni. Fá av tøkniligu framstigum heimsins í dag, sum ikki ísraelar/jødar,beinleiðis hava uppfunnið ella verið við í.
Ísrael er millum fremstu lond heimsins í læknavísindi og granskan av heilivági, ikki minst fyri sjúkur, sum í dag verða roknaðar at verða ógrøðiligar.
Ísrael er millum fremstu landbúnaðarlond í heiminum á tøkniliga økinum, somuleiðis at vinna vatn úr sjógvi, sum Ísrael hevur gjørt í mong ár. Í hesum sambandi kann nevnast, at Ísrael hjálpir grannatjóðini, Jordan við at vinna vatn úr sjógvi at hjálpa teimum innan landbúnaðin, umframt at veita teimum ravmagnsorku. Hetta ger seg serstakliga galdandi við vesturmark Jordans, eystanvert Deyðahavið. Í dag verður talað um, at leggja gassleiðing úr Ísrael til Europa.
Ein føroysk sendistova í Jerusalem hevði óivað verið sera gagnligt fyri føroyskt vinnulív og økt um samhandilin landanna millum, somuleiðis elvt til framstig í Føroyum.