Klaksvíkar Talvfelag væl umboðað í Norðurlendskari kapping.
Norðurlandameistaraheitið í skúlatelving verður telvað í vikuskiftinum. Íslendingar eru vertir, og telvað verður á Borgarnesi. Kappingin er skipað í 5 aldursbólkar, og hava Norðurlondini tvey umboð í hvørjum bólki. Úr Klaksvík luttaka Janus Skaale, Flóvin Matras Tummasarson og Rókur Davidsen. Meðan Janus hevur nógvar royndir frá hesum kappingunum, er hettar talan um fyrstu ferð hjá Flóvini og Róki.
Síðani hópurin bleiv úttikin í novembur mánaða, hevur GM Helgi Dam Ziska havt regluligar venjingar við teimum. Hóast flestu telvararnir er lægst rataðir í øllum bólkum, hava fyrireikingarnar verið góðar.
Umframt venjingarnar, hava NM-luttakararnir eisini luttikið í heimligu kappingunum undan fráferð. Seinasta veruliga royndin var Kjølur Open, sum seinastu árini hevur verið fastur táttur, stutt undan NM.
Ta kappingina vann Luitjen Akselsson Apol sannførandi, meðan hinir ikki smæddist burtur. Janus Skaale og Jón í Horni Nielsen endaðu javnir á 2. plássi.
Føroyski hópurin fór til Íslands tíðliga hósmorgunin, tí longu kl 10 fríggjadagin 15. februar byrjaði fyrsta umfar. Ferðalagið telur 20 fólk, umframt at Rógvi Egilstoft Nielsen er við sum venjari. Telvað verða 6 umfør, og endar kappingin sunnudagin 17. februar.
Fylgjast kann við kappingini á: https://skak.is/nycc2019/
Fyrireikararnir hava boðað frá, at 20 talv verða víst beinleiðis (Live), 4 úr hvørjum bólki.
Føroysku luttakarirnir eru hesir:
Bólkur A
Janus Skaale, 1765, Klaksvíkar Talvfelag
Eli W. Finnsson, 1659 Havnar Telvingarfelag
Bólkur B
Leif Reinert Fjalleheim, 1712 Havnar Telvingarfelag
Flóvin M. Tummasarson, 1551, Klaksvíkar Talvfelag
Bólkur C
Jón í Horni Nielsen, 1756 Sandavágs Talvfelag
Benjamin Reinert Fjallheim, 1465 Havnar Telvingarfelag
Bólkur D
Luitjen Akselsson Apol, 1854 Havnar Telvingarfelag
Elias Petersen, 1005 Havnar Telvingarfelag
Bólkur E
Rókur Davidsen, Klaksvíkar Talvfelag
Brestir Samuelsen, Havnar Telvingarfelag