Flogbóltsfamiljan varð savnað í Klaksvík í gjár, tá hálvfinalurnar hjá bæði kvinnum og monnum vórðu leiktar. Fleyr gjørdi eitt gott hál og eru umboðaði í báðum finalunum, meðan SÍ og Mjølnir eru í hvør sínari. 

Nógvir áskoðarar í høllin gjøgnum dagin

Høllin prógvaði í gjár, at hon er perfekt til flogbólt. Fyrireikingararbeiðið fevndi m.a. um at leggja taraflex-gólv á, eins og aðrar ábøtur kring um sjálvan vøllin, so umstøðurnar vórðu í topp.

Høllin hevur tvær langsíður og tær geva áskoðarunum sera gott útsýni til dystin, umframt at tað skapar eina kenslu hjá leikarum, sum teir spæla í einum potti. 

Kaffi og matsøla við borðum á svalanum til áskoðarar

Flogbóltssambandið og Mjølnir syrgdu fyri at liðini, miðlafólk og áskoðarar høvdu framúr karmar.

FM1 høvdu rigga seg til við einum studio, har fleiri samrøður vórðu gjørdar

Hálvfinalurnar høvdu allan sín spenning, men kvinnudystirnir gjørdust báðir sera tættir og spennandi. Samanumtikið ein langur og væleydnaður flogbóltsdagur í Klaksvíkar, sum megnaði at seta flogbóltin á breddan og servaðan út í allar føroyskar stovur. 

Tveir av ungu Mjølnirleikarunum til upphitingina

Steypafinalurnar verða leiktar í Høllini á Hálsi í Tórshavn leygardagin 2. mars og sunnudagin 3. mars.