Í Klaksvík hevur verið tosað um møguleikan kanska at byggja hotell í miðbýnum, tí hevði henda framløgan eisini áhuga her. Eisini liggja í løtuni tekningar á borðinum í Tórshavn fyri tveimum hotellum, sum skulu hýsa eini 300 sengrum.

38 ára gamli Robert Thomsen úr Norðragøtu hevur verið eitt rættuligt stjørnuskot innan hotellvirksemið í Keypmannahavn. Úr Gøtu hevur hann helst eisini fingið eina góða byrjan. Mary, mamma Robert átti kioskina í Norðragøtu, sum við tíðini bleiv staðið, har fólk hittust í Gøtu fyri árum síðan.

Her lærdi Robert fyrstu trinini um kundatænastu og rakstur. Mary legði stóran dent á, at sonurin var fyrikomandi og smílandi ímóti viðskiftafólki, ið komu í kioskina. Eisini kravdi hon, at hann var hampuliga klæddur til arbeiðis, tí tað hevði stóran týdning, at viðskiftafólkini ikki bara fingu góða tænastu, men eisini at tey kendu seg væl, tá tey vitjaðu í kioskina.

So við hesum barnalærdóminum um at vera siðiligur, fyrikomandi og hampuligur fór Robert út í heim, og sitir nú á ovastu rók í fyritøkuni, Arp-Hansen Hotel Group í København, sum í dag hevur 4.350 kømrum, 800 starvsfólk og væl omanfyri milliardina í umsetingi.

Hetta hevur kravt mót og førleika at satsa, samstundis at lesa av marknaðin og rákið innan ferðavinnuna. Robert kom nógv inn á ymisk hagtøl, sum hann eisini samanbar við ferða- og hotellvinnuna í Føroyum - við kømrum og ferðamynstri, sum eru broyting.

Robert kom eisini inn á, hvussu neyðugt tað er millum starvsfólkini at kenna seg væl og kenna seg sum part av eini “familju”, ið er kring hotellið, tey arbeiða á - 13 hotell eru í hotellketuni Arp-Hansen. Tí hevði starvsfólkarøkt og trivnaður nógv at siga fyri tey. Av somu grund eru starvsfólkini við til at áseta virðirgrundarlagið fyri Hotellketuna.

Hotellvinnan hevur støðugt voksið og tað vísir seg, at hvørjaferð, hotellini og kømruni leggjast til, fer kostnaðurin eitt vet niður í styttri skeið, men so stabiliserar vinnan seg aftur og kostnaðurin fer uppaftur – og sama ger eftirspurningurin.

Ein sera spennandi framløga, sum m.a. vísir, at vit ikki nýtast at óttast eina øking i hotellkømrunum í Førouym. Tó er eftirspurningurin í Føroyum kanska í so stórur í summarhálvuni í mun til um veturin, har eftirspurningurin er meira javnur alt árið í t.d. Danmark. Hetta er ein avbjóðing í Føroyum, at longja “ferðavinnuárið“.