Í morgin kl. 14: SEV - Grønar Føroyar
Í morgin kl. 14, í Spinnaríinum, fara Hákun Djurhuus, stjóri í SEV, og menningarleiðarin hjá elfelagnum, Terji Nielsen, at greiða frá grønu kósini, sum SEV og Føroya Landsstýri hava arbeitt við seinastu fimm árini, og hvørji næstu stigini verða.
Teir viðgera m.a., hvussu skilabest er at fara fram við grønum útbyggingum, pumpuskipanum, battarískipanum og orkugoymslum, umframt hvussu SEV áhaldandi heldur eyga við nýggjum møguleikum, so sum sjóvarfalsorku.
Samstundis hevur tað alstóran týdning, at øll stig, sum verða tikin, verða grundað á ein skynsaman búskap. Eisini er neyðugt at hjálpa brúkarunum at fremja orkuskiftið við grønum hita – og flutningsloysnum – t.e. hitapumpum og elbilum.
Í 2015, sum hevur verið higartil besta grøna árið, stavaðu 60 prosent av elframleiðsluni frá vatni og vindi. Síðani hevur grøna elframleiðslan ligið á umleið 50 prosentum um árið. Tó at battarískipanin í Húsahaga og aðrar tillagingar hava gjørt SEV ført fyri at fáa meira av varandi orku til høldar, so hevur vøksurin í elnýtsluni verið so stórur seinnu árini, at árliga grøna elframleiðslan ikki hevur verið uppi á 60 prosentum aftur.
Hinvegin er tað ikki óvanligt, at elframleiðslan einstakar dagar liggur millum 80 og 100 prosent úr vatni og vindi. Hákun Djurhuus og Terji Nielsen vísa í fyrilestrinum í Spinnarínum á, hvør grøna leiðin er frameftir, við støði í tí undirstøðukervinum, sum longu er lagt á elorkuøkinum.
Hvar: Spinnaríið
Nær: Leygardag 23. februar kl. 14.00