Dýr sentralisering av sjúkrahúsverkinum
Sum Norðlýsið skilir, liggja kostnaðarmiklar ætlanir í sambandi við menningarætlanina fyri sjúkrahúsverkið í buktini, nú allir tríggir stjórarnir eru farnir frá.
Hóast tað higartil bert er leiðslan, sum er miðsavnað, so bendir alt á, at kostnaðirnir eru byrjaðir at vísa seg. Sum blaðið skilir, hevur forstjórin ikki fingið undirtøku frá restini av leiðsluni til at seta partar av menningarætlanini fyri sjúkrahúsverkið í verk. Júst hvørjar partar talan er um, er ikki greitt enn, men fylgt verður við málinum.
Synergieffekt, effektivisering, rationalisering o.a., sum í teoriini eigur at standast av miðsavning, hevur hinvegin enn ikki víst seg, og eftir øllum at døma fer ongin sparing heldur at standast av miðsavningini.
Landsstýriskvinnan átti kanska at gripið momentum, nú sjúkrahúsverkið liggur í leiðsluloysi, til at bakka aftur til gamla bygnaðin við trimum sjálvstøðugum leiðslum, sum verða álagdar at samstarva.