Koks missir møguliga staðsetingina
Norðlýsið skilir, at Yvirfriðingarnevndin hevur vent tumlinum niður til matstovuna Koks, hvat viðvíkir at brúka økið við Gjónna til sítt framhaldandi virksemi.
Matstovan Koks hevur verið nógv meira enn ein sólskinssøga. Hon hevur verið ein sensatión. Koks hevur gjørt tað ómøguliga og fingið eina Michelinstjørnu til Føroya, og tá hildu fólk at tað var tað størsta sum bar til.
Men enn einaferð gjørdi hon tað ógjørliga og vann sær sjálvari og Føroyum enn eina stjørnu. Høvuðskokkurin á Koks hevur somuleiðis fingið framúr útmerkilsir fyri sína matgerð. Norðlýsið kundi, sum einasti føroyski miðil, bera frálíku tíðindini úr salinum í Tónleikahúsinum í Århus tann 18 februar.
Men øll ævintýr fáa ein enda, og trøini vaksa ikki inn í himmalin. Nú frættist, at Yvirfriðingarnevndin hevur valt at ganga ímóti umsókn frá Koks um framhaldandi virksemi við Gjónna. Hesi tíðindini eru enn so fesk, at tað ikki er greitt enn, júst hvat hetta inniber, men fylgt verður við málinum.