Nú er holið úr Havn inn í Eysturoynna nærum sprongt ígjøgnum, og skjótt verður koyrandi eftir nýggum vegi millum Havnina og Eysturoy. Men tá skal eisini farast undir at gjalda milliardir til teirra, sum hava fíggja. Spurningurin er tí nú, hvat tunnilsgjaldið verður? Holið kostar meira enn tvífalt kostnaðin av Vága- og Norðoyatunlunum. Prísurin øll tey fyrstu árini í teimum báðum tunlunum var 160 krónur pr. túr fyri ein persónbil. Hetta svarar til, at gjaldið í Eysturoyartunlinum verður umleið 350 krónur pr. túr fyri hvønn persónbil. Neyvan verður tað so høgt, men tað er órímiligt, ja, órættvíst, um gjaldið ikki verður tað sama sum tað var í Vága- og Norðoyatunlunum øll tey fyrstu árini. Ein stórur partur av fólki helt tá, at tað var nátúrligt at tey, sum koyrdu gjøgnum teir núverandi undirsjóvartunlarnar, rindaðu henda prísin.

Nakað annað er so nýtslan av Eysturoyartunlinum, hvør kemur at koyra ígjøgnum hann? Eitt kann man rokna við, at nógv ferðsla verður støðugt eftir núverandi vegi norður gjøgnum Sundalagið, ikki bara tí, at har verða færri akfør. Hugsa vit um norðingar, sum ferðast til og frá flogvøllinum, ella vágafólk, sum skulu til Klaksvíkar ella inn í Eysturoynna, verður neyvan fyrst koyrt til Havnar, har at rindað tunnilsgjald, fyri síðan at renna seg í ein ferðslupropp í Runavík.

Einasta, sum kann fora fyri hesum, er, sum ein norðingur tók til, at bummgjald verður sett við brúnnað um Streymin, fyri at fora bilum at koyra tann vegin.

Men nú fáa vit at síggja.